Un po per ridere e, un po per la disperazione di chi non riesce a capacitarsi di come vadano le cose nel nostro paese, ogni tanto vado a rileggermi le invettive che mastro Bruno Pelaggi, scalpellino di Serra San Bruno, alla fine dell'800, rivolgeva a Dio e ai potenti.
La consolazione che ne deriva nella costatazione che niente è cambiato, mi aiuta a superare la frustrazione che mi assale ogni qual volta provo a leggere le cronache politiche dei quotidiani di oggi: locali e nazionali.
Spero lo sia anche per voi...

Littira a ru Rre
Di Mastru Brunu Pelaggi
Di suba 'sta muntagna
ti jiéttu 'na gridàta:
síentila 'sta chjamàta
ed éja, príestu!

Non mi fari 'mu ríestu
futtútu di lu tuttu,
ca non sai quant'è bruttu
l'aspittari...!

Né arróbba, né dinari
trúovi alla casa mia,
perciò ricurru a ttia
si bbúoi 'mu sìenti.

'Sti chjiànti e 'sti lamíenti,
`sti vuci e 'sti suspíri
tóccali, si non cridi,
cu' li mani!

Vidi com'è la fami,
ca púoi mi cridi a mmia,
e vidi s'è buggia
quantu ti dicu...

Si tu si' bìeru amicu
di li súdditi toi,
ópera giústu, e púoi
dúormi. squitatu.

Si bbúoi 'mu si' adurátu
di tutti li 'Taliani
spàrtandi lu pani
e síenti a mmia,

ch'e trúoppu tirannia
pi' nnui, póvar'aggénti:
a cu tuttu a cu nenti
non è giustu!

Duna a cu vuoi l'arrustu,
lu míegghju e lu cchjiú grúossu:
a nnui dúnandi 'n'úossu,
cúomu cani.

Sempi lavúru e pani
circàu lu calabrisi;
ma tu sciáli di risi
e cugghjiuniji!

Apira l'úocchji e bbidi;
jiétta 'nu sguardu 'ntúornu!
Vidi ca mai fa jiúornu
e sempri è scuru.

Menta carchi lavúru
`mu nd'abbuscamu pani,
ca la morti di fami
è trúoppu cruda!

'Taliani cu' la cuda
ndi carculasti a nnui, `
ma tu si' duru cchjiúi
di 'nu macignu...!

Mo' chi cazzu mi 'mpignu
'mu pagu la fundiária
si la mia casa para
'nu 'spitali?

'Nu líéttu e 'nu rinàli,
'na seggia e 'nu vrascieri:
quandu vena l'ascieri
pigghjia cazzi!

È miégghjiu mu nd'ammázzi
ch'é miégghjiu 'mu murimu:
chi cazzu lu vulimu
'stu campàri,

quandu pi' fatigari
bussàmu ad ogni porta
e nno' ndi dun'ascórta
nudù cani?

"Basta! Simu 'Taliani!"
gridamma lu Sissanta
¬e mo' avógghjia 'mu canta
la cicala La fami cu' la pala
si pigghjia e cu' la zzappa
cu è giúvini si la scappa
a Novajórca...

A nu' àtri ndi tocca
suffriri a mussu chjúsu
e quàci' 'ntra lu pirtúsu
di lu culu! ,

Vidi ca non su' sulu
chi cantu 'sta canzúni,
ma parecchj miliúni
di 'Talianì

gridamu pi' la fami,
miseria e povirtà
diciendu: "Maistà,
pani 'e lavúru!"

Si parru cu' 'nu muru
forsi rispundiría;
ma ca ' parru cu' ttia
píerdu lu tíempu!

Du' vúoti ‘stu lamíentu
a ttia ti lu mandai.
Non ti dignàsti mai
'mu mi rispúndi!

Picchì ha' 'mu li nascúndi
li gridi calabrisi?
Non pagàmu li spísi
guàli a tutti?

Ma tu ti ndi strafútti,
li deputati cchjiúi...
duva 'ncappàmma nui,
póvar'aggénti!

Non sperari cchjiú nenti,
Calabria sbinturáta!
Tu si' dimenticata
pi' 'nu tíernu

di Dio, di lu goviernu
e di lu Ministeru:
pi' 'na cruci e 'nu zeru
si' stimáta,

e sulu si' chjiamàta
alli súoliti passi:
mu paghi 'mpúosti e tassi,
e nenti cchjiúi!

jio mo' parru cu' . bbúi,
ministri e deputati:
chi cazzu mi predicati
"Pro Calabria"

Cca mai si vida 1'árva,
sempi simu allu scuru!
Non truvamu lavúru
Ppi' ‘nu jiúornu.

Già non aviti scúornu
sempi 'mu prumintiti!
E mai nenti faciti
'mu campamu.

E tu, núostru suvrànu,
màncu nci dici nenti!
Non bidi ca 'st'aggénti
ndi castíjia?

Sempi ndi cugghjiuníjia
a tutti sti Paísi,
ca sgràvanu li spisi
e fannu strati,

e 'mbéci cchjiú gravati
li spisi; a strati nenti...!
E nnui, póvar'aggénti,
li cridímu...!

E púoi quandu vidímu
smurzata la lantérna,
cu' 'nu ' Recumatérna '
addio Calabria!