FraSqui

Condividi

C’è statu nu tiampu c’a Santu Mauru u cc’era d’assà diffirenza intra a populazioni ppi quantu riguardava i cundizioni i da vita.
A fami si vidiva intra tutti i casi e ra lordia si tagghijava ccu ri curteddra.
A saluti pua, era nu lussu e ra morti ppi cchijù d’ancunu, na sarvazioni.
Vinimunindi ca aru paisi nuastru, na vota è binuta a ssi firmari na zzingara ccu nu figghjiu sulu.
Forzi picchì era sula e ccu nu figghju proppu ninnu, chissa avia pinsatu i si firmari cca.
Tra ca i mura chissi gianti u ll’hanu mai cumpurtati, e tra ca a pussidenza era sutta zeru, sa fimmina s’arranciava d’a durmiri duvi li capitava.
E na vota lijiva ra manu, na vota ccu l’ervi facia ri cosi i da magìa,n’atra vota facia trumbiceddri e risciva d’a manciari armenu ogni tri jiuarni, iddra e ru figghjiu.
Mo, cumi è gghjiuta e cumi è binuta, u quatrariaddru, ch’era già cunsatu a rosa mistica, nu juarnu ha cadutu malatu.
A mamma s’ha misu a girari chiri casi casi ppi circari ancuna cosa c’u putjia d’aiutari, …ma chini ti ndi dava.
Tra, ca u cci nd’era pi nuddru, tra, ca i zzingari ud’eranu propria, cumi si dicia… amati, chiru chi ricugghjia u d’abbastava mancu ppi n’aciaddru, figuramuni ppi nnu guagliuni suffirenti.
Ppi nnu ra fari troppu longa, arrivamu a diri ca doppu nu par’i juarni a criatura è vulata a ru paradisu i di zzingari.
Mammasa assu puntu, doppu chi l’ha corvicatu, e prima i si ndi jiri ppi sempri i Santu Mauru, ndolirata cum’era, ha sagghjiutu subba u campanaru i da Mmaculata, s’adi affacciatu a nna finestra i di campani, pua, ccu ri minni i fora s’ha misu a gridari:
“Figghjiuma!… Cavarcaturu di li puddritre!… Figghjiu sonaturu di trumba!… Simu vinuti i du paisi i di juri a ru paisi di la mmerda!
Sia smalidittu ppi sempri Santu Mauru e tutti i santamarisi!

Parabula significa:
U d’è ca è ppi chissa malidizioni ca u paisi nuastru u riescia d’a ssi mintiri ncarreggiata.