Gataniaddru u cci vulia mai jiri a pigghjiari l’acqua a Massu. Ccu ru zzu Pasquali, pua, i nenti i du tuttu: u sapia ca pua avia d’aspittari sempri ad ancunu chi l’aiutava a carricari i varrili subb’u mbastu. U zzu Pasquali cc’era ppi parìrica, e ormai l’avia capitu ca u mandavano ccu d’iddru sulu ppi nnu fari fujiri u ciucciu sgasciandu i varrili. Chira era l’unica occasioni ch’avia ppi ssi fari na bella galoppiata ccu “Zzimbaru” e ra mamma cci ncuddrava a ru zzu Pasquali ca siccomi u putia ncavarcari purtava ru ciucciu i capizza. Cchi gustu cc’era a caminari ncavaddru senza putiri fuiri, e ccu ru ciucciu chi tirava d’aru zzu Pasquali. U povaru viacchiju, povariaddru u nd’avia mancu tanta curpa: iddru nd’avissa fattu a menu daviaru i su sirvizzu ma, ccu chira gamba sciancata e ru vrazzu musciu chi sind’avia purtatu i da prigionia, ud’è ca putia fari tantu u sccriffignusu, […]