Littira a ru dimoniu
E mo’ a cu scrivu cchjiú: su’ tutti muti!
Nudu mi rispundíu, scuntíentu mia!
Io li prigài, non li chjiamài curnúti
e tanti cúosi giusti nci dicía…
Nci dissi ca ccà simu strafuttúti!
Ti para ca nci dissi la buggía?
Ma a nudu serva cchjiú ‘mu si lamenta:
lu veru surdu è cu non ‘bbó ‘mu senta!
Scrissi allu Patritíernu e non mi ‘ntisa,
puoi all’arré ‘Mbertu chi nd’assassinàru.
Cu’ lu Signuri pirdívi la spisa
ca a Chidu ‘n’àtra vota lu ‘nchjiovàru!
E ‘ntantu jío restai cu’ la cammísa,
ca li panni c’avía si cunzumàru.
Mo’ nci scrivu a Luciferu, allu ‘Mpíernu,
ch’è ‘mperaturi di ‘nu grúossu riegnu. ” “
Si ‘st’atru non rispúnda, si strafútta:
arménu sacciu ca li pigghjiài pari…
Scrissi prima alli supa, e mo’ alli sutta;
chidu d’ammíenzu dassàmulu stari
ed è ‘n’ arrecíeddu búonu di cundútta,
sulu… ch’è scarzicíeddu di dinari:
sinnò di búonu cori siriría
e carcósa mi dava puru a ‘mia.
Ad ognúnu chi scrissa nci dunau
e tanti nd’aiutau povar’aggénti.
Púozzu cridíri ca mo’ li spicciati?
Io sacciu ca pi’ mmia non nci fu nenti!
Po’ esseri ‘mu si dimenticau
o non ‘mu nci passavi pi’ la menti…
Jío fui sempi allu mundu spurtunatu:
niscívi tundu e non múoru quatratu!
Nci vo’ furtuna e ‘nu cúornu allu culu!
quand’hai ‘sta cosa puoi cadíri a mmari
ca chidu cúornu si ndi néscia sulu
e lu culu puoi s’ínchjia di dinari.
A fundu non vai mai, statti sicuru,
ca la furtuna non ti fa annigari;
a vógghjia ca s’infuria la timpésta,
ca non ti passa mancu pi’ la testa.
Ma la furtuna mia è ‘na gran signura,
ca è veramenti fígghjia di pputtana!
Cúomu sta attenta, cúomu tena cura
‘mu mi va cuntra la vécchjia arruffiana!
Si l’avria ‘ntra l’únghji ‘na menz’úra
lu culu nci faria quantu ‘na tana!
‘Nu jornu la ‘ncuntrai ‘ntra ‘nu palazzu:
j ‘mu l’affíerru m’acchjappai ‘nu cazzu!
Fujìu cúomu ‘nu lampu: arrassusìa!
Tri vuoti la chjiamai: non rispundìu,
quantu la prigai: furtuna mia!
ca mi votau li spadj e scumparíu.
Jìo, l’amaru, ‘m ‘aspetta nci dicìa,
‘mu guarda cúomu ognunu mi futtìu,
quantu mi strapazzai senza guadagnu!
E ida non vo’ mancu ‘mu mi lagnu!
Mo’ la fazzu ‘mu ‘mpara di crianza,
ca nci dissi a Minossi: « Afferramìla
e portamila ‘ntra la miégghjiu stanza,
duv’ava lu cchjiú fúocu, e vrusciamila.
Dúoppu vrusciata tagghjianci la panza
e quandu ti fa fami mangiatila…
Fanci ‘mu paga quantu ficia a mmia!
Ma guarda non ‘mu futta puru a ttia…
Tu sai lu fattu tuoi, non bbúoi parúoli!
Dimúonu fusti sempi spiritúsu…
vidi ca si t’afferra li stigghjiúoli
ha’ ‘mu ti li sumpúorti a mussu chjiúsu!
Ed a vógghjia ca gridi e ca ti duoli…
li scippa e puoi ti resta lu pirtusu.
Méntati ammìenzu l’anchi ‘nu landúni,
non ‘mu ti crasta, ‘mu ti fa capuni!
Tu ridi? Ma cu’ ida non si scherza!
Tèniti pronta a ‘na mani ‘na mazza,
all’atra mani téniti ‘na pezza
‘mu l’attacchi all’occhj a chjda cazza.
Crijiu ca siti guàli di furtezza:
tu liga buonu, non ‘mu ti strapazza.
La jíetti ‘ntra li fiàmmi li cchjiú vivi
e d’arriedi nci fai li lavativi ».
E mo’ Luciferu è cuntíentu tuttu
vidíendu ca cu’ ddidu mi vutài!
Jio di lu riegnu súoi mi ndi strafúttu
cà ndàva cchjiú di ccà turmíenti e guàj.
Ch’ésti ‘nu ‘Mperatúri tantu bruttu
jio ‘ntra la menti mi lu figurai.
Pi’ l’ambizziúoni a Dio nci misa guerra
e di lu cíelu passàu sutta terra’.
E non scrivu chjú a nudu cà m’incrísciu;
di riestu víjiu ch’è tíempu pirdútu.
Lu Patritíernu mi passàu di lísciu.
jio non fici atru ca ‘mu gridu « aiutu »
‘St’atru suvrànu dissa: « Non capísciu
chi bbo”stu calabbrisi strafuttútu…
Si ‘n’atra vota mi scriva e mi ‘nzúrta
lu míentu carcirétu e si strafútta » .
04/03/2007
Mastru Brunu Pelaggi